* «Астана» командасы өз тарихындағы ең ірі жеңісіне жетті. Бұған дейін елордалықтар қарсыластарын 2 рет — 6:1 есебімен (2011 — «Қайрат», 2014 — «Астана»), 3 рет 5:0 есебімен (2013 — «Атырау», 2014 — «Ордабасы», «Спартак») тұқыртқан еді.
* «Атырау» командасының» қақпашысы Жасур Нәрзіқұлов Қазақстан премьер-лигасындағы 150 матчын өткізді. Бұл көрсеткішке ол 5 команда («Ордабасы», «Ақтөбе», «Қайсар», «Тараз», «Атырау») командалары сапында жетті. 150 ойында Нәрзіқұлов өзі қорғаған қақпаға 147 гол жіберіп алды.
* «Астана» командасының жартылай қорғаушысы Серікжан Мұжықов «Атырау» қақпасына қос гол соғып, өзінің Қазақстан чемпионаттарындағы рекордын қайталады. Ол биыл 6 дәл соққы жасады. 2010 жылы «Жетісу» сапында ол 6 гол авторы атанып, ең нәтижелі маусымын өткізген еді.
* С.Мұжықов өз ғұмырындағы үшінші дублін жасады. Бұған дейін ол 2010 жылы — ел чемпионатында, 2012 жылы Қазақстан кубогында 1 матчта 2 гол соққан болатын.
* Бұл тур белгілі мергендердің «гол құрғақшылығынан» арылған күні болды. Р.Муртазаев — 20 мамырдан бері, Б.Исламхан 17 маусымнан бері ешбір турнирлерде көзге түсе алмаған еді. Ал «Ақжайықтың» украиналық шабуылшысы К.Дудченко өткен жылдың 22 қазанынан бері 13 кездесуде қанжығасын майлай алмаған-ды.
* Р.Валиуллин «Ақтөбе» сапындағы алғашқы голын соқты.
* «Қайрат» биылғы жеңіліссіз ойындар сериясының үздік көрсеткішін жаңартты. Осы турда алматылықтар 14 ойында қатарынан жеңілмеген осы маусымдағы алғашқы команда болды.
* «Астана» қатарынан 9-жеңісіне жетті. Бұл да — биылғы ең үздік серия.