«Барыс» Гагарин кубогы жолындағы сапарын аяқтады. Ширек финалдың 4-матчында астаналықтар өз айдынында «Металлургтан» (Магнитогор, Ресей) овертаймда 2:3 есебімен жеңілді. Бұған дейінгі 3 кездесуде де магнитогорлықтардың асығы алшысынан түсті — 0:4, 4:5, 3:5.
«Барыс» өз тарихында екінші рет плей-офф сериясында 0:4 есебімен қарсыласынан таза жеңіліп отыр. 2010/2011 маусымында біздің команданы 1/8 финалда «Ақ барыс» (Қазан, Татарстан) 4 матчта да еш мүмкіндік бермей ұтқан еді.