Данияр Елеусінов кәсіпқойлар арасындағы төртінші жекпе-жегін әдемі жеңіспен аяқтады. АҚШ-тың Бостон қаласында өткен бокс кешінің андеркартында ол жергілікті боксшы Мэтт Догертимен жұдырықтасып, бірінші раундтың ортасында техникалық нокаутпен басым түсті. Бұл кездесу 6 раундқа жоспарланған еді. Елеусінов ә дегеннен жекпе-жек тізгінін қолға алып, қарсыласын бас көтертпей соққылады. Сағат тілі 2 минут, 33 секундты санағанда төреші араға түсіп, тоқтатуға белгі берді. Отандасымыздың екі рет бүйректен, бір рет иек астынан жасаған соққысы Догертиді сансыратып тастағаны сөзсіз еді.
Догерти кейіннен өз пікірін айтып, жекпе-жек нәтижесімен келіспейтінін білдірді. «Менің кездесулерімді қарап жүрген адамдар болса, қарсыласыма алдымен мүмкіндік беріп, мейлінше шаршатып алып барып төпелейтінімді білер еді. Төреші менің жолымды кесті. Ол тоқтата салысымен мен: «Бұл қалай, мен жалғастыруға дайынмын ғой», – деп едім, төреші: «Болды, бұдан әрі қажеті жоқ», – деді. Соңғы раундқа дейін қойғыласуға дайын едім», – деді ол.
Ал Елеусінов қарсыласының демалысы ауырлап кеткенін, жекпе-жек жалғаса берсе, жағдайын одан сайын қиындауы мүмкін екенін айтты. Енді Данияр келесі кездесуін 30 қарашада Монте-Карлода (Монако) өткізуге тиіс. Қарсыласы әлі анықталған жоқ. Бұл жолы ол бірінші ауыр салмақтағы Денис Лебедев (Ресей) – Майк Уилсон (АҚШ) жекпе-жегінің андеркартында өнер көрсетеді.
Отандасымыз кәсіпқойлар арасындағы 4 кездесуін де жеңіспен аяқтады. Ол екі рет – АҚШ-та, екі рет Ұлыбританияда шаршы алаңға шықты.
Бостонда өткен бокс кешінің басты жекпе-жегінде WBO тұжырымы бойынша орта салмақта әлем чемпионы атағы сарапқа салынды. Бұл атақ британдық Биллли Джо Сондерске тиесілі еді. Алайда жақында ол допинг-сынамадан өте алмай», атағынан айырылды. Бос атаққа үміткерлер Деметриус Андраде (АҚШ) және Уолтер Каутондоква (Намибия) таласып, америкалық боксшы төрешілер шешімімен жеңіске жетті. Жекпе-жек барысында Андраде қарсыласын төрт рет нокдаунға түсірді.
Алдағы уақытта Д.Андраде Геннадий Головкинмен кездесуі өте мүмкін. Отандасымыз алдағы көктемде шаршы алаңға оралады. Сол кезде оның ендігі қарсыласы нақты белгілі болады.