Жолдастық кездесу. 10 маусым
Австрия – Бразилия – 0:3 (Жезус, 36, Неймар, 63, Коутинью, 69)
Бразилия құрамасының шабуылшысы Неймар бұл кездесуде екінші голды енгізіп, Бразилия құрамасындағы мергендік көрсеткіші бойынша Ромарионы қуып жетті. Қазір екі мергеннің еншісінде 55 дәл соққыдан бар.
Дегенмен тиімділік жөнінен Неймар бәрібір Ромариодан қалыңқы. Ромарио 55 голды 70 кездесуде соқса, Неймар 85 матчта енгізіп отыр.
Неймардың алдында енді екі алып тұр: 98 ойында 62 гол соққан Роналдо және 92 ойында 77 рет мергендік танытқан Пеле. Неймар 7 гол соқса – Роналдоны, 22 гол соқса, Пелені қуып жетпек.
Ол ауыр жарақатынан жақында ғана жазылып, кейінгі екі матчта да көзге түсіп үлгерді. Мұның алдында ол Хорватия құрамасының қақпасынан саңылау тапқан болатын.
Бразилия алдағы әлем чемпионатында Е тобында сынға түседі. Қарсыластары – Швейцария (17 маусым), Коста-Рика (22 маусым) және Сербия (27 маусым).