Бүгін футболдан Қазақстанның 26-чемпионаты басталды. Маусымашар күні ұлттық біріншіліктің қызғылықты деректерін оқырман назарына ұсынамыз.

Ардагер командалар
Қазақстанның жоғары лигаларында барлық чемпионатқа қатысқан командалар екеу ғана — «Ертіс» пен «Шахтер». Ал «Қайрат», «Тобыл» жəне «Тараз» командалары 23 чемпионатта бақ сынаған. «Ақтөбе»- 22, «Жетісу» 20 біріншілікте өнер көрсетті.

Қырықтың қайсысы Қыдыр?
Қазақстанның 26 ұлттық біріншілігінде барлығы 40 команда ойнады. «Яссы» (Түркістан), «Арман» (Кентау), «Динамо» (Алматы), «Қарашығанақ» (Ақсай), «Достық» (Алматы), «Намыс» (Алматы), «Яссы-Сайрам» (ОҚО), «Автомобилист» (Шортанды), «Наша компания» (Астана), «Қазақмыс» (Сəтбаев) командалары жоғары лигаларда 1 жыл ғана бой көрсетті.

«Ертіс» ылғи тасиды
Қазақстан чемпионаттары тарихындағы ең атақты команда — «Ертіс». Керекуліктер 25 жылда 15 рет (5 алтын, 4 күміс, 6 қола) жеңімпаздар тұғырына көтерілді. «Ақтөбе» — 12 рет (5, 3, 3), «Қайрат» — 9 рет (2, 2, 5), «Тобыл» 8 рет (1, 4, 3) жүлдегерлер қатарынан көрінді. Жалпы, чемпионаттарға қатысқан 40 ұжымның 16-сы əр жылдары түрлі жүлде тағынды.

Екі пентакампеон
1992-2016 жылдар аралығында 9 команда Қазақстан чемпионы атағына қол жеткізді. 5 рет дара шыққан клуб екеу — «Ертіс» пен «Ақтөбе». 3 рет чемпион атанғандар үшеу — «Спартак» (бұрынғы «Елім-ай»), «Астана-1964» жəне «Астана». «Қайрат» пен «Шахтер» 2 реттен, «Тараз» бен «Тобыл» бір-бір рет алтын жүлдеге ие болды.

Үздіксіз жүлдегерлер
Бірнеше жыл қатарынан жүлдегерлер қатарына ену көрсеткіші бойынша «Ақтөбенің» рекордын жуық арада ешбір команда жаңарта алмайды. «Ақтөбе» 2005-2015 жылдар аралығында 11 жыл бойы үздік үштіктен төмендеген жоқ. Бұл кезде ақтөбеліктер 5 рет ел чемпионы атанды, 3 рет күміс жүлде иеленді, 3 рет қола алды. Екінші көрсеткіш «Тобыл» еншісінде. Қостанайлықтар 7 маусым бойы  (2002-2008) үздіктер сапында болып, 4 күміс, 3 қоланы қанжығалады. «Ертіс» 5 жыл (1996-2000) ішінде 2 алтын, 1 күміс, 2 қола жүлде жеңіп алды. Ал соңғы 4 маусымда «Астана» (3, 1, 0) жəне «Қайрат» (0, 2, 2) жүлдегерлер тұғырынан түспей келеді.

«Астана» рекорд жаңарта ма?
Чемпиондық атақты 3 жыл қатарынан иеленген 2 команда бар. «Ақтөбе» 2007-2009 жылдар аралығында үш рет бас жүлде иеленді. Ал «Астана» 2014 жылдан бері ел чемпионатында теңдессіз атанып келеді. Биыл да тұғырынан түспесе, елордалықтар чемпион атағын қорғау көрсеткіші бойынша рекорд жаңартады.