108 жылдық тарихы бар Boxing news басылымының сайты олимпиада алтынын ала алмаған ұлы боксшылардың рейтингін жариялады. Тізімнің көш басында отандасымыз Геннадий Головкин тұр.
«Қазақстандық «мұзжарғыш» əуесқой бокста тамаша табыстарға жетті, алайда Афина алтынын ала алмады. Ол финалда ұпай санымен ресейлік Гайдарбек Гайдарбековтен ұтылмас бұрын Андре Диррелдің шаңын қақты» делінген Головкин туралы.
Жалпы, рейтингтегі ондық мынадай:
1. Геннадий Головкин (Қазақстан, 75 келі). Афина олимпиадасының финалында Г.Гайдарбековтен (Ресей) жеңілді.
2. Мигель Котто (Пуэрто-Рико, 63,5 келі). Сидней олимпиадасының іріктеу кезеңінде болашақ чемпион Мұхаммедқадыр Абдуллаевтен (Өзбекстан) ұтылды.
3. Флойд Мейуезер (АҚШ, 57 келі). Атланта олимпиадасындағы алғашқы жекпе-жегінде отандасымыз Бақтияр Тілегеновті І раундта нокаутпен ұтып, жартылай финалда Серафим Тодоровқа (Болгария) 9:10 есебімен есе жіберді. Сөйтіп, қола жүлдегер атанды.
4. Рой Джонс (АҚШ, 71 келі). Сеул олимпиадасының финалында жергілікті Парк Си Хуннан 2:3 есебімен жеңілді. Олимпиадалар тарихындағы ең əділетсіз шешімнің бірі ретінде жиі еске алынатын жекпе-жек.
5. Айк Куорти (Гана, 63,5 келі). Сеул олимпиадасының 1/8 финалында австралиялық Грем Чениге есе жіберді.
6. Константин Цзю (КСРО, 63,5 келі). Сеул олимпиадасының ширек финалында болашақ чемпион Андреас Цюловтан (ГДР) жеңілді.
7. Эвандер Холифилд (АҚШ, 81 келі). Лос-Анжелес олимпиадасының жартылай финалында жаңазеландиялық Кевин Барримен жұдырықтасып жатып, ІІ раундта төрешінің «тоқта» деген командасынан кейін соққы жұмсағаны үшін айыпталды. Сөйтіп, қола медаль иеленді.
8. Майк МакКаллум (Ямайка). Монреаль олимпиадасына қатысты.
9. Вилфредо Гомес (Пуэрто-Рико, 54 келі). Мюнхен олимпиадасына қатысты.
10. Джон Х.Стрейси (Ұлыбритания, орта салмақ). Мехико олимпиадасында іріктеу кезеңінде Ронни Харристен жеңілді.