Еуропа лигасы. Финал
25 мамыр
«Манчестер Юнайтед» — «Аякс» — 2:0 (Погба, 18, Мхитарян, 48)
«Манчестер Юнайтед» командасының бас жаттықтырушысы Жозе Моуринью Чемпиондар лигасы мен Еуропа лигасын (УЕФА кубогын) кемі екі реттен жеңіп алған алғашқы бапкер болып отыр.
Ол 2002/03 маусымында «Портудың» (Португалия) бас бапкері ретінде УЕФА кубогын иеленді. Ал 2003/04 маусымында Чемпиондар лигасында топ жарды. 2009/10 маусымында «Интерді» (Италия) Чемпиондар лигасының басты жүлдесіне бастап апарды.
Ал үш командамен еурокубокты жеңіп алу көрсеткіші бойынша Моуринью үшінші маман болып отыр.
Оған дейін Удо Латтек (Германия) бірінші болып үш еуротурнирде топ жарды: 1974 ж, — Еуропа чемпиондарының кубогы («Бавария»), 1979 ж. — УЕФА кубогы («Боруссия» Д), 1982 ж. — Кубок иелерінің кубогы («Барселона»).
Мұндай жетістікке екінші болып қол жеткізген маман — Рафаэль Бенитес (Испания). Ол 2004 жылы «Валенсия» (Испания) тізгіншісі ретінде — УЕФА кубогын, 2005 жылы «Ливерпульмен» (Англия) бірге — Чемпиондар лигасын, 2013 жылы «Челсимен» Еуропа лигасын ұтып алды.