ӘЧІ-2018. Оңтүстік Америка
Бразилия — Парагвай — 3:0 (Коутинью, 34, Неймар, 64, Марсело, 85)
Бразилия құрамасы өз алаңында Парагвайды 3:0 есебімен ұтып, 2018 жылы Ресейде өтетін әлем чемпионатына іріктеу ойындары арқылы бірінші болып жолдама алды. 14 турда пентакампеондар 33 ұпай жинады.
Бір жыл бұрын ғана Бразилияның алдағы әлемдік додаға ерте жолдама алатынын елестетудің өзі қиын еді. Дунганың басшылығымен пентакампеондар 6 ойында небары 2 жеңіске жетіп, 3 матчты тең аяқтады, 1 ойында есе жіберді. Жазда Бразилия футбол федерациясы Дунганы отставкаға жіберді де, орнына «Палмейрастың» бас бапкері Титені қойды.
Содан бергі 8 матчта футбол сиқыршылары тек жеңумен келеді. Эквадорды — 3:0, Колумбияны — 2:1, Боливияны — 5:0, Венесуэланы — 2:0, Аргентинаны — 3:0, Перуді — 2:0, Уругвайды — 4:1 және Парагвайды 3:0 есебімен тұқыртып, Бразилия Ресейге жолды ашып қойды.
Бразилия — осыған дейін өткен 20 әлем чемпионатының барлығына қатысқан жалғыз команда. 5 алтын, 2 күміс, 2 алтын жеңіп алған бразилиялықтар әлемдегі ең атақты құрама саналады. Соңғы әлем чемпионатында олар өз елінде 4-орын алды. Бірақ тарихта тұңғыш рет пентакампеондардың өз қақпасына жіберген голдары соққан доптарынан көп болды (11:14). Л.Ф.Сколари жаттықтырған құрама жартылай финалда Германиядан — 1:7, ІІІ орын үшін кездесуде Голландиядан 0:3 есебімен ойсырай ұтылды.