Испания. «Атлетико» — «Сельта» — 3:2
«Атлетико» биыл примерадағы 22 кездесуінде өз қақпасына 18 гол жіберіп алды. Өткен жылы дәл осынша допты мадридтіктер бүкіл маусым барысында дарытқан-ды. Алда әлі 16 тур бар. Демек, Диего Симеоне шәкірттері чемпионат аяқталғанша отызға жуық допты өз қақпасынан алып шығуы мүмкін.
Франция. «Монако» — «Метц» — 5:0
«Монаконың» шабуылшысы Килиан Мбаппе «Метц» қақпасына хет-трик жасады. Сөйтіп, 18 жастағы шабуылшы монаколықтар сапындағы 37 кездесуде (1478 минут) 12 гол соқты. Бұл көрсеткіш «Монаконың» бұрынғы шабуылшысы Тьерри Анридікінен әлдеқайда тәуір. Анри монегасктар сапындағы 12 голын 51 ойында (2663 минут) енгізген болатын.
Италия. «Кальяри» — «Ювентус»- 0:2
«Ювентустың» шабуылшысы Гонсало Игуаин алаң иелері қақпасына дубль жасап, биылғы А сериясындағы 20 және 21 голдарын соқты. Аргентиналық шабуылшы барлық турнирлерде өткізген соңғы 12 кездесуінде 11 рет мергендік танытып отыр. Өткен жылы ол «Наполи» сапында 38 гол авторы атанды.
Испания. «Осасуна» — «Реал» М — 1:3
«Реалдың» президенті Флорентино Перес қорғаушы Серхио Рамосқа 500 деген нөмірі бар мерейтойлық футболканы сыйға тартты. Серхио Рамос осы матчта өзінің «Реал» сапындағы 500-кездесуін өткізген-ді.
Ол «Реалға» 2005 жылы «Севильядан» ауысты. Содан бері Испания чемпионатын 3 рет, Чемпиондар лигасын 2 рет жеңіп алды.