Statsport.kz порталы 2016 жылғы маусымның мерген футболшылары жайлы сериялы мақалаларын жалғастырады. Бұған дейін Елдос Ахметов пен Роман Муртазаевтың мергендігін талдаған болатынбыз. Бұл жолы Ғафуржан Сүйімбаевтың нәтижесін сараптаймыз,
Ғафуржан Сүйімбаев 2016 жылы 2 команданың құрамында – «Ордабасыда» және «Қайратта» өнер көрсетті.
Ол қазақ футболының аламанына 2010 жылы қосылып, «Ордабасының» негізгі құрамынан әуелі лимитші болып орын тапқан-ды. Алғашқы голын 2012 жылдың 26 тамызында Оралда «Ақжайық» командасының қақпасына енгізді. Әрине, қапталдағы қорғаушыдан керемет мергендік күтпейтініміз анық. Сондықтан оның 2016 жылға дейінгі 6 жылда 3 рет қана таблоларға өз тегін жаздыруын заңдылық деп қарадық.
Дегенмен 2016 жылы Сүйімбаев сұмдық нәтижелі ойнады. Ол маусым ортасына дейін «Ордабасы» сапында «Оқжетпес» пен «Ақжайық» қақпасын дәл көздеді. Шілдеде «Қайратқа» ауысқан соң чемпионатта — «Ақтөбе» мен «Оқжетпеске» гол соқты, ел кубогының жартылай финалында «Атырауды» тізерлетуге үлес қосты.
Ал Копенгагендегі Дания — Қазақстан кездесуінің 17 минутында айып алаңының сыртынан тамаша соққы жұмсап, есепті теңестіргені де есімізде. Бірақ сол есепті біздің құрама ұстап тұра алмады (1:4).
Ғафуржан 2016 жылы өзі қатысқан 4 турнирдің үшеуінде мергендік танытты. Әттең, «Қайрат» — «Маккаби» кездесуінің соңғы минутында енгізген добы есепке алынбады, әйтпесе, өткен маусымда барлық майданда көзге түскен жалғыз футболшымыз болатын еді.
Демек, мешін жылы Ғ.Сүйімбаев 6 гол соқты. Сөйтіп, бұған дейін 6 жылда соққан голдарын (3) үш есе көбейтті.
Сүйімбаевтың 2016 жылғы голдарының ресми статистикасы мынадай:
| № | Матч | Күні | Турн. | Кезең/тур | Есеп | Мин | Қақпашы | Қалай? | Нег/қос | Стадион |
| 4. | «Ордабасы» — «Оқжетпес» — 2:2 | 19.06.2016 | ҚЧ | 17 | 2:0 | 36 | С.Стаменкович | Сол аяқ | 90 | Шымкент, Қажымұқан |
| 5. | «Ақжайық» — «Ордабасы» — 0:1 | 24.06.2016 | ҚЧ | 18 | 0:1 | 42 | Н.Қалменов | Сол аяқ | 90 | Орал, П.Атоян |
| 6. | «Қайрат» — «Ақтөбе» — 3:1 | 20.08.2016 | ҚЧ | 24 | 2:1 | 62 | С.Отарбаев | Оң аяқ | 90 | Алматы, Орталық |
| 7. | «Қайрат» — «Оқжетпес» — 5:0 | 29.10.2016 | ҚЧ | 32 | 5:0 | 86 | С.Стаменкович | Сол аяқ | 90 | Алматы, Орталық |
| 8. | «Атырау» — «Қайрат» — 0:3 | 06.11.2016 | ҚК | ½ (2) | 0:1 | 2 | Р.Нұрмұхаметов | Сол аяқ | 90 | Атырау, «Мұнайшы» |
| 9. | Дания – Қазақстан – 4:1 | 11.11.2016 | ӘЧІ | 4 | 1:1 | 17 | Ф.Реннов | Сол аяқ | 90 | Копенгаген, «Паркен» |
2017 жылы да «Қайраттың» қорғаушысынан осындай нәтижелі ойын күтеміз.
«Оқжетпес» қақпашысын күтпеген соққымен қапы қалдырды.
«Ақжайық» қақпасына алыстан соққан тамаша гол!
«Ақтөбе» қақпасына голды оң аяғымен соқты!
Жерге түсірмей теуіп, допты «Оқжетпес» қақпасында тулатты! (5:0)
Қазақстан кубогының жартылай финалында «Атырау» қақпасына да айып алаңының сыртынан дәл соқты!
Бұл енді нағыз шедевр!