«Барселонаның» жартылай қорғаушысы Андрес Иньеста 5 турдағы «Атлетикоға» қарсы матчтың (1:1) 41 минутында Иван Ракитичке пас шығарып беріп, тамаша жетістікке қол жеткізді.
Ол осылайша Испания примерасының соңғы 14 маусымында кем дегенде 1 рет гол пасын жасаған жалғыз футболшы болып отыр.
Иньеста «Барселонаның» негізгі құрамында 2002 жылдан бері ойнап келе жатыр. Ол содан бері Ла-лигада командаластарын 83 рет нақты голға айналған пастармен қамтамасыз еткен. Ал «Барселона» сапындағы барлық турнирлердегі гол пастарының саны — 129.
Ла Лигада Иньеста сол 2002/2003 жылғы маусымда ғана тамаша паспен көзге түсе алмапты. Оны да түсінуге болады. Андрес сол маусымда алаңға 6 рет қана шықты. Одан кейін негізгі құрамға тұрақты ілігіп, алаң ортасындағы «мық шегеге», мығым тұлғаға айналды.
2012/13 жылғы маусымда Иньеста примерадағы 31 матчқа қатысып, 16 гол пасының авторы атанды. Бұл да — қайталануы қиын жетістік.
«Барселона» сапында Чемпиондар лигасын 4 рет жеңіп алған, 8 рет Испания чемпионы атанған бұл асықтай жігітке және бір ұлы рекорд тиесілі: ол — Чемпиондар лигасының үш финалында әріптестеріне голға айналған пас шығарып берген жалғыз футболшы. Иньеста 2009 жылы — Самуэль Это’Оға («Барселона» — «Манчестер Юнайтед» — 2:0, 10 минут), 2011 жылы — Лионель Мессиге («Барселона» — «Манчестер Юнайтед» — 3:1, 54 минут), 2015 жылы Иван Ракитичке («Барселона» — «Ювентус» — 2:0, 4 минут) голдың пасын жасады.
Андрес Иньеста — екі дүркін Еуропа (2008, 2012) чемпионы, 2012 жылғы әлем чемпионы.