«Астана» — «Янг Бойз» (Швейцария) — 0:0
Еуропа лигасы. В тобы. ІІ тур

— «Астана» Еуропа лигасындағы алғашқы ұпайын иеленді.

— «Астана» еурокубоктарда өз алаңындағы жеңіліссіз матчтар сериясын 10 матчқа жеткізді. Соңғы рет елордалықтар 2014 жылдың 3 шілдесінде Еуропа лигасына іріктеудің плей-офф кезеңінде «Астана-Аренада» Испанияның «Вильярреал» командасынан 0:3 есебімен ұтылған еді. Содан бері С.Стойлов шәкірттері өз алаңында 10 матч өткізіп, бәрінде жеңілген жоқ — «Марибор» (Словения) — 3:1, ХИК (Финляндия) — 4:3, АПОЭЛ (Кипр) — 1:0, «Галатасарай» (Түркия) — 2:2, «Атлетико» (Мадрид) — 0:0, «Бенфика» (Португалия) — 2:2, «Жальгирис» (Литва) — 2:1, «Селтик» (Шотландия) — 1:1, БАТЭ (Беларусь) — 2:0.

— «Астана» Еуропа лигасының топтық турнирінде 2013 жылғы «Шахтердің» ізімен келе жатыр. Сол жылы кеншілер алғашқы турда сырт алаңда ПАОК-тан (Грекия) 1:2 есебімен ұтылып, ІІ турда өз алаңында («Астана-Аренада») Израильдің «Маккабиімен» тең ойнаған-ды — 2:2. Яғни, «Шахтер» де, «Астана» да Еуропа лигасының топтық турниріндегі алғашқы ұпайын ІІ турда өз алаңында иеленді. Бірақ «Шахтер» кейінгі 4 кездесуде жалғыз ғана ұпай алып (АЗ — 1:1), сырт алаңдағы үш ойында да ұтылды. «Астана» бұл көрсеткішті жақсарта түсуге тиіс.

— «Астананың» осы кездесуде иеленген 0,5 ұпайы Еуропа клубтық коэффицентінде биылғы Қазақстан командалары жинаған ұпайлар санын тура 2,0-ге жеткізді. Естеріңізге саламыз, әрбір тең ойын — 0,5, әрбір жеңіс 1 ұпай болып саналады. Сонда биылғы еуромаусымда «Ордабасы» ел қоржынына — 0,5 («Чукарички» — 3:3), «Ақтөбе» — 0,5 (МТК — 1:1), «Қайрат» — 2,5 («Теута» — 1:0, 5:0, «Маккаби» Т-А — 1:1), «Астана»  3,5 ұпай («Жальгирис» — 0:0, 2:1, «Селтик» — 1:1, БАТЭ — 2:0, 2:2, «Янг Бойз» — 0:0) салды. Осы 8 ұпайды еурокубоктарға қатысқан 4 командамызға бөлсек, 2,0 ұпай шығады.

— Клубтық коэффицентте Қазақстан 14,500 ұпаймен 54 ел ішінде 29-орында тұр. Алға жылжуға мүмкіндік аз, арттағылар қуып жететіндей қауіп жоқ. 28-орындағы Болгарияның 15,125 ұпайы бар. «Астана» топтағы қалған 4 кездесуде де ұтып, плей-оффқа шықса ғана болгарларды өкшелеп қалуымыз мүмкін. Ал 30-орында тұрған Словенияның (13,125 ұпай) барлық командасы жарыстан шығып қалды.

— «Астана» мен Дмитрий Шомко өздерінің еурокубоктардағы 30-матчын өткізді. Р.Каньяс қазақстандық командалар («Шахтер», «Астана») 39 рет еурокубоктарда алаңға шығып, рекордшы М.Хайруллинге барынша жақындады. Келесі турда «Олимпиакосқа» қарсы ойнаса, Каньяс та 40 матчқа қатысқан болып саналады.