«Ордабасы» Еуропа лигасына бірінші іріктеу кезеңінен кіріседі. Өткен жылы шымкенттіктер осы кезеңде Сербияның «Чукарички» командасына жол берген болатын. Биылғы қарсыласы – Боснияның «Широки Бриег» командасы.
«Широки Бриег» 2013 жылы Еуропа лигасының екінші іріктеу кезеңінде «Ертістен» айла асырып кеткен-ді. Павлодардағы ойында «Ертіс» 3:2 есебімен жеңіске жетсе, қарымта ойында босниялықтар жауапсыз екі гол соқты. Өз тарихында еурокубоктарда ең алысқа ұзағаны да сол жыл. Бірақ үшінші кезеңде «кеңжағалаулықтар» Италияның «Удинезесінен» екі ойында 1:7 есебімен ұтылды. Өткен жылы «Широки Бриег» Еуропа лигасының бірінші іріктеу кезеңінде «Биркиркарадан» (Мальта) жеңіліп, жанкүйерлерін жерге қаратты.
18.07.2013 ж. «Ертіс» — «Широки Бриег» — 3:2 (Шомко, 14, Юрин, 41, Сүйімбаев, 86 — Кордич, 56, Шилич, 64)
25.07.2013 ж. «Широки Бриег» — «Ертіс» — 2:0 (Еше, 20, Иванкович, 74)
Бұл команда 1948 жылы құрылған. Босния және Герцеговинаның екі дүркін чемпионы, ел кубогының үш дүркін жеңімпазы. Өткен маусымды «Широки Бриег» қола жүлдемен қорытындылады.
Босниялық клубтар біздің командалармен сәтті ойнауды дәстүрге айналдырып келеді. 2010 жылы Мостар қаласының «Зриньски» командасы Қостанайдың «Тобылын» екі кездесуде де 2:1 есебімен жеңіп, Еуропа лигасының екінші іріктеу кезеңіне өткізбеді.
01.07.2010 ж. «Тобыл» — «Зриньски» — 1:2 (Жұмасқалиев, 13 — Драгичевич, 53, 82)
08.07.2010 ж. «Зриньски» — «Тобыл» — 2:1 (Джидич, 10, Пехар, 72 — Жұмасқалиев, 57)
«Ордабасы» «Широки Бриегті» 29 маусымда Алматыда қабылдайды. Қарымта кездесу 6 шілдеде өтеді.
