Италия. А сериясы. 27 тур
«Торино» — «Палермо» — 3:1
«Торино» шабуылшысы Андреа Белотти бұл матчта хет-трик жасады. Сөйтіп, 22 голмен А сериясының мергендер көшін бастады. Оның ізіне түскен Гонсало Игуаин («Ювентус») және Един Джеконың («Рома») 19 дәл соққысы бар. 
Белотти «Торино» клубының тарихында 1986/87 маусымынан кейін бір жылда кемі 2 хет-трик жасаған алғашқы ойыншы болып отыр. Ол биылғы маусымның басында (2 тур, «Торино» — «Болонья» — 5:1) бірінші хет-трик тіркеп еді. Ал 1986/87 маусымында шабуылшы Вим Кифт «Торино» сапында 19 матч өткізіп, 8 гол соққан, соның екеуі — хет-трик.
Белотти «Палермо» қақпасына 3 голын 73, 76 және 81 минуттарда енгізді. Нақты уақыты — 7 минут, 15 секунд. Бұл көрсеткіш бойынша ол 2000 жылдың 30 қаңтарынан бергі рекордты жаңартты. Бұрынғы рекорд украиналық шабуылшы Андрей Шевченкоға («Милан») тән еді, ол 7 минуттан астам уақыт ішінде «Перуджа» қақпасына қарымтасыз 3 гол соқты. 

Англия. Премьер-лига. 27 тур
«Тоттенхем» — «Эвертон» — 3:2
Шабуылшы Ромелу Лукаку бұл кездесуде 1 гол соғып, «Эвертонның» АПЛ тарихындағы бас мергеніне айналды. Ол 60 голы бар Данкан Фергюсоннан 1 дәл соққы артық жасады.  
Лукаку премьер-лигада барлығы 78 гол соқты (17 доп — «Вест Бромвич Альбион» сапында). 24 жасқа дейінгі мергендер арасында Лукакудың көрсеткіші — төртінші. Ол Майкл Оуеннің (110 гол), Робби Фаулердің (106) және Уейн Рунидің (86) ізін басып келеді. 

Италия. А сериясы. 27 тур
«Удинезе» — «Ювентус» — 1:1
«Ювентус» қақпашысы Джанлуиджи Буффон А сериясындағы 612 матчын өткізді. Бұл көрсеткіш бойынша ол «Романың» шабуылшысы Франческо Тоттиді қуып жетті. Тотти мен Буффон қазір IІІ орында. Олардан көп матчқа қатысқан 2 футболшының да аты аңызға айналған — Паоло Мальдини («Милан», 647 матч), Хавьер Дзанетти («Интер», 615).

Ресей. Премьер-лига. 18 тур
«Крылья Советов» — «Локомотив» — 0:3
Қақпашы Гильерме теміржолшылар сапындағы 200-кездесуін өткізді. Бұл көрсеткіш бойынша ол Сергей Овчинников (366 матч) және Золтан Мелистен (237) кейінгі ІІІ орынға көтерілді. Осы 200 ойынның 69-ында Гильерме қақпасына гол соқтырмады. Бұл көрсеткіш бойынша ол Руслан Нығматуллинмен теңесті. 

Англия. Премьер-лига. 27 тур
«Тоттенхем» — «Эвертон» — 3:2
«Тоттенхемнің» бас жаттықтырушысы Маурисио Почеттино ағылшын футболындағы 100-жеңісіне қол жеткізді. 100 жеңістің 77-сіне Почеттино — «Тоттенхем» тізгінінде, 23-іне «Саутгемптон» тізгінінде ие болды.

Франция. 1 лига. 28 тур
«Монако» — «Нант» — 4:0

«Монако» маусымның соңына 10 тур қалғанда нәтижелілік бойынша клуб рекордын жаңартты. Бұрынғы рекорд 1977/78 маусымына тиесілі болатын, онда монегаскілер 79 гол соққан-ды. Биыл 82 гол енгізіп үлгерді. Демек, рекорд әлі де жаңара түседі.
«Монако» биылғы маусымда 15-рет бір матчта 3 голдан артық соғыпты. Бұл — Еуропадағы ТОП-5 чемпионаттарындағы ең жоғары нәтиже.
«Монако» шабуылшысы Килиан Мбаппе осы матчта мергендік танытып, соңғы 30 жылда 1 лигада 10 гол енгізген ең жас ойыншыға айналды. Мбаппенің жасы қазір 18-де (18 жас, 2 ай). Килиан биылғы чемпионатта — 9, өткен маусымда 1 гол авторы атанды.
Ал Валер Жермен осы матчта 1 голмен көзге түсіп, өз спорттық ғұмырындағы доп санын 32-ге жеткізді және өзінің әкесі Бруно Жерменнің нәтижесін жаңартты. Б.Жермен 1978-1995 жылдар аралығында 1 лигада ойнап, 31 гол соққан-ды. Бірақ баласына қарағанда, үлкен Жерменнің алаңдағы орны бөлек болды, ол қорғаушы/артқы жартылай қорғаушы позициясына жауапты болды.