Бүгін Анатолий Тимощуктың «Қайраттан» кететіні мәлім болды. Т.Сегізбаев академиясында өткен кездесуде жанкүйерлер украиналық легионерге ду қол шапалақпен құрмет көрсетті.
1,5 жыл ішінде Тимощук «Қайрат» сапында екі рет Қазақстанның күміс жүлдегері атанды, екі рет Қазақстан кубогының финалында ойнап, 2015 жылы жеңіп алды, Қазақстан Суперкубогын иеленді.
«Қайраттың» негізгі құрамында ол түрлі турнирлерде 40 кездесу өткізіп, 1 гол соқты.
Тимощук «Қайратқа», жалпы қазақ жанкүйерлеріне несімен қымбат?
Ол — Қазақстан премьер-лигасынан Еуропа чемпионатының финалдық кезеңіне қатысқан әзірше бірінші футболшы. Биыл Анатолий Украина құрамасы сапында құрлық додасына қатысып, Украина — Польша (0:1) кездесуінің 90+2 минутында алаңға шықты.
Әйтпесе, А.Тимощуктың атақ-даңқы бір басына жетіп артылады.
Ол:
— Украинаның 3 дүркін чемпионы (2002, 2005, 2006)
— Украина кубогының 3 дүркін жеңімпазы (2001, 2002, 2004)
— Украина суперкубогының иегері (2005)
— Ресейдің 2 дүркін чемпионы (2007, 2015)
— Ресей суперкубогының иегері (2008)
— Германияның 2 дүркін чемпионы (2010, 2013)
— Германия кубогының 2 дүркін жеңімпазы (2010, 2013)
— Германия суперкубогының 2 дүркін иегері (2010, 2012)
— Қазақстан кубогының иегері (2015)
— Қазақстан суперкубогының иегері (2016)
— Чемпиондар лигасының жеңімпазы (2013)
— УЕФА кубогының иегері (2008)
— УЕФА суперкубогының иегері (2008)