Ағылшын премьер-лигасы биылғы маусымаралық үзіліс кезінде трансферлерге 1 миллиард фунттан артық қаржы жұмсады.
Бұл — турнирдің өзіндік рекорды.
«Манчестер Юнайтед» «Ювентустан» жартылай қорғаушы Поль Погбаны 105 млн еуроға сатып алып, биылғы жаздың ең қымбат трансферін жүзеге асырды.
«Манчестер Сити» екі трансферге 100 млн еуродан артық ақша шығындады: «Эвертоннан» Джон Стоунзды — 56 млн еуроға, «Шальке-04-тен» Лерой Санені (суретте) 49 млн еуроға сатып алды. Мұның сыртында, «Барселонадан» 19 млн еуроға ауысқан қақпашы Клаудио Браво және бар.
«Манчестер Юнайтед» Погбадан бөлек, Генрих Мхитарянды Дортмундтың «Боруссиясынан» 42 млн еуроға бағалап алды. «Вильярреалдан» ауысқан қорғаушы Эрик Байи де арзан емес. Оның трансферіне жұмсалған 38 млн еуро да оңай ақша болмаса керек.
«Арсенал» Швейцария құрамасының ойыншысы Гранит Джаканы «Боруссиядан» (Мөнхенгладбах) 45 млн еуро жұмсап, қатарына алды.
Премьер-лигадағы 20 клубтың 12-сі биылғы жазда өздерінің трансферлік рекордын жаңартты.
Басқа лигалар да қарап жатқан жоқ.
Бразилия құрамасының шабуылшысы Халк «Зениттен» (Ресей) Қытайдың «Шанхай Теллейс» командасына 55800000 еуроға сатылды.
«Бавария» (Мюнхен) өз мектебінің түлегі Матс Хуммельсті — «Боруссиядан», Еуропа чемпионы Ренату Саншешті «Бенфикадан» 35-35 млн еуродан 70 млн еуроға сатып алды.
«Севильядан» ПСЖ-ға ауысқан поляк Гжегож Крыховяк та қымбат бағаланды — 33600000 еуро.