Хоккейден Канада құрамасы Еуропа құрамасын финалда 2:1 есебімен ұтып, Әлем кубогын жеңіп алды. Осылайша, хоккей тарихында бір құраманың аса мәртебелі 3 атақты бір уақытта, яғни, үзіліссіз жеңіп алу дәстүрі үшінші рет болып отыр.
1984 жылы КСРО құрамасы осындай табысқа жеткен болатын. Кеңес командасы 1981 жылғы Әлем кубогында, 1983 жылы ГФР-да өткен әлем чемпионатында және 1984 жылғы Сараево олимпиадасында басты атақтардың бәрін иеленді.
2004 жылы Канада құрамасы осы табысты қайталап, 2002 жылғы Солт-Лейк-Сити олимпиадасында, 2004 жылғы әлем чемпионатында (Чехия) және сол жылғы Әлем кубогында дара шықты.
Міне, тағы 12 жылдан кейін Канада осы жетістігін қайталап, өзінің хоккей Отаны деп бекер атанып отырмағанын және бір дәлелдеді. Үйеңкі жапырақты елдің өкілдері 2014 жылғы Сочи олимпиадасында, 2015 жылы Чехияда өткен әлем чемпионатында жеңімпаз атанған еді.