Италия. А сериясы. 26 тур
«Интер» — «Рома» — 1:3
«Рома» 1994/95 маусымынан бері алғаш рет «Интерді» чемпионаттағы 2 матчта да тізе бүктірді. І айналымда римдіктер «нерадзурриді» 2:1 есебімен ұтқан болатын.
Испания. Примера. 24 тур
«Атлетико» — «Барселона» — 1:2
«Атлетиконың» бас бапкері Диего Симеоне мадридтік клубтың бас бапкері ретінде 300-матчын өткізді. Бес жарым жыл ішінде аргентиналық маман өз командасын 187 рет жеңіске бастады, 61 ойынды тең аяқтады, 52 кездесуде жеңілді. Доп айырмасы — 521:221 (соққан голы 300-ге артық).
Симеоне басшылығымен «Атлетико» 5 ірі жеңіске жетті — Испания чемпионатын (2014), Испания кубогын (2013), Испания суперкубогын (2014), Еуропа лигасын (2012) және УЕФА Суперкубогын (2012) жеңіп алды. Сондай-ақ, екі рет — 2014 және 2016 жылдары Чемпиондар лигасының финалында ойнады.
Испания. Примера. 24 тур
«Реал» М — «Вильярреал» — 3:2
«Реал» Ла Лигадағы 35 ойында үздіксіз гол соғып, 1951/52 маусымындағы өз рекордын қайталады. Соңғы рет король клубы 2016 жылдың 27 ақпанында (бір күні кем бір жыл бұрын) «Атлетико» қақпасының кілтін аша алмаған болатын — 0:1.
Сондай-ақ, «Реал» өзі қатысқан барлық турнирлерде қатарынан 44-ойында қарсыластар қақпасын дәл көздеп, «Барселонаның» рекордын қайталады. Соңғы рет мадридтіктер 2016 жылдың 26 сәуірінде Чемпиондар лигасының жартылай финалында «Манчестер Ситимен» голсыз ойын өткізген болатын. Содан бері Зиданның шәкірттері 44 матчта 117 гол соқты.
Испания. Примера. 24 тур
«Реал» М — «Вильярреал» — 3:2
«Реал» шабуылшысы Криштиану Роналду «Вильярреал» қақпасына пенальтиді дәл соғып, примерадағы нәтижелі 11 метрлік доптар санын 57-ге жеткізді. Ол бұрынғы рекордшы Уго Санчесті (ол да «Реал», 56 гол) басып озды.
Англия. Лига кубогы. Финал
«Манчестер Юнайтед» — «Саутгемптон» — 3:2
«МЮ» өз тарихындағы 41-бас жүлдеге қол жеткізіп, бұл көрсеткіш бойынша «Ливерпульді» қуып жетті. «Манкуниандықтар» 20 дүркін Англия чемпионы атанды, 12 дүркін Англия кубогын иеленді, 5 рет Англия лигасының кубогын ұтты, 4 рет еурокубокты қанжығалады.
«Ливерпульде» болса, чемпионат — 18, Англия кубогы — 7, Лига кубогы — 8 және еурокубоктар — 8.
Үшінші орындағы «Арсеналдың» 29 трофейі бар.
«МЮ» бас бапкері Жозе Моуринью төртінші рет Лига кубогын жеңіп алып отыр. Бұған дейін ол «Челсиді» 2005, 2006 және 2016 жылдары осы жетістікке бастап барған болатын. Бұл көрсеткіш бойынша португал маманы даңқты Брайан Клаф және Алекс Фергюсон секілді мамандармен теңесті.
Англия. Премьер-лига. 26 тур
«Челси» — «Суонси» — 3:1
«Челсидің» жартылай қорғаушысы Сеск Фабрегас Англия премьер-лигасындағы 300-матчын өткізді. Мерейлі ойында ол есеп ашты. Фабрегас 212 ойынға «Арсенал» атынан қатысса, 88 рет «Челси» жейдесімен алаңға шықты.