Азия клубтық чемпионаты: сегіз жылдан кейін бұзылған сең

Авторы — Серік Қантай
62 ел мүше болған волейболдан Азия конфедерациясына Қазақстан 1992 жылы қабылданды. Ал 1999 жылдан бастап ұйымдастырылған Азия клубтық чемпионатында ел намысын маусым жеңімпаздары қорғап келеді. Биыл қыздар арасындағы (2016 жыл) клубтық Азия чемпионаты Филиппиннің Биньян қаласында 3-11 қыркүйек аралығында болады. Ел намысын қыздардан 2015/16 жылдардағы маусым жеңімпазы Өскемендік «Алтай» волейбол клубы қорғайды. Біз бүгін қыздардан Азия клубтық чемпионатының статистикасына үңілетін боламыз.
Азия клубтық біріншілігі Қазақстанда тек бір рет өтті. 2004 жылы Алматыда өткен жарыста алты клубтың ішінен «Рахат Алматы» чемпион болса, «Астана қанаты» алдына «Чун Шань» (Тайван) клубын жіберіп төртінші орын алды. Қазақстан дәл сол жылы ғана чемпионатқа екі клуб қосты.
Клубтық Азия чемпионатындағы нәтижелеріміз:

1999 жыл. Тайланд — «Алма-Динамо» ВК (Алматы) – 4-орын (6 клуб).
2001 жыл. Вьетнам – «Рахат» ВК (Алматы) – 4-орын (8 клуб).
2002 жыл. Тайланд – «Рахат» ВК (Алматы) – 3-орын (8 клуб).
2004 жыл. Қазақстан – «Рахат» ВК (Алматы) – 1-орын; «Астана» ВК – 4-орын (6 клуб).
2005 жыл. Вьетнам – «Рахат» ВК (Алматы) – 4-орын (7 клуб).
2006 жыл. Филиппин – «Рахат» ВК (Алматы) – 4-орын (7 клуб).
2007 жыл. Вьетнам – «Рахат» ВК (Алматы) – 1-орын (8 клуб).
2008 жыл. Вьетнам – «Жетісу» ВК (Талдықорған) – 6-орын (8 клуб).
2009 жыл. Тайланд – «Жетісу» ВК (Талдықорған) – 4-орын (11 клуб).
2010 жыл. Индонезия – «Жетісу» ВК (Талдықорған) – 2-орын (10 клуб).
2011 жыл. Вьетнам – «Жетісу» ВК (Талдықорған) – 3-орын (8 клуб).
2012 жыл. Тайланд – «Жетісу» ВК (Талдықорған) – 4-орын (9 клуб).
2013 жыл. Вьетнам – «Жетісу» ВК (Талдықорған) – 2-орын (8 клуб).
2014 жыл. Тайланд – «Жетісу» ВК (Талдықорған) – 3-орын (10 клуб).
2015 жыл. Вьетнам – «Жетісу» ВК (Талдықорған) – 5-орын (9 клуб).
— 2000 жылы Қазақстан клубтық Азия чемпионатына қатысқан жоқ, 2003 жылы біріншілік өтпей қалды.

Қазақстан 17 жылдың ішінде «Алтаймен» есептегенде Азия клубтық чемпионатына 5 клуб қана  қосты. Алты жыл «Рахаттың», сегіз жыл «Жетісудың» ығынан шыққан алғашқы клуб – «Алтай».