Ағылшын чемпионшипі
Стив Макларен «Дерби Каунти» командасының бас бапкері қызметінен екінші рет босатылды. Ол 2013-15 жылдар аралығында «Дерби» тізгінін бірінші рет ұстаған еді. Ал өткен жылдың қазанында Макларен Найджел Пирсонның орнына келген болатын. Қазір «Дерби» чемпионшипта 37 турдан кейін 10-орында тұр. Соңғы 5 кездесуде Макларен шәкірттері 4 ұпай ғана жинады. Макларен кезінде Англия құрамасында бас жаттықтырушы болды. Бірақ содан кейін ірі табыстарға жете алмай жүр.

Испания. Примера. 27 тур
«Реал» — «Бетис» — 2:1
«Реалдың» жартылай қорғаушысы Тони Кроос команда капитаны Серхио Рамосқа нәтижелі пас шығарып берді. Стандартты жағдайлардан кейін гол пасын шығарып беру көрсеткіші бойынша Кроос көш бастап келеді. Маусым басынан бері ол стандарттардан 7 пас шығарған, бұл көрсеткіш бойынша оған примерада жететін ешкім жоқ.
Бұл кездесуде жеңіс голын Серхио Рамос соқты. Капитан биылғы маусымда баспен алтыншы добын енгізіп отыр. Примерада басымен осынша нәтижелі ойнаған басқа футболшы жоқ. Рамостың соңғы 23 голының 19-ы ойын тағдырына тікелей әсер еткен, яғни, не есепті теңестірген, не командасына жеңіс әкелген. Соңғы 4 голын Рамос Кроостың стандартты жағдайда көтерген пастарынан кейін соққан.

Италия. А сериясы. 28 тур
«Интер» — «Аталанта» — 7:1
«Интердің» шабуылшысы Мауро Икарди 26 минутқа дейін 3 гол соқты (17, 23, 26 минуттар). Бұл — миландық клубтың соңғы 70 жылдағы ең жылдам хет-тригі. 1947 жылдың 26 қазанында «нерадзурридің» шабуылшысы Бенито Лоренци 18 минутқа дейін 3 гол соғып үлгеріпті.

Испания. Примера. 27 тур
«Депортиво» — «Барселона» — 2:1
Луис Суарес гол соққан ойында «Барселона» бірінші рет жеңіліп отыр. Бұған дейін барлық турнирлердегі 72 матчта уругвайлық мерген каталондықтардың жеңісіне үлес қосып келіпті. Биылғы маусымда Суарес 25 кездесуге қатысып, 21 гол соқты және 11 нәтижелі пас шығарып берді.

Ағылшын премьер-лигасы. 28 тур
«Ливерпуль» — «Бөрнли» — 2:1
Бұл кездесуде «Ливерпуль» алдымен доп жіберіп алып, жігерлі жеңіске қол жеткізді. Мерсисайдтықтар 4 (төртінші) жігерлі жеңіс иеленді. Осы көрсеткіш бойынша қазір Англияда Клопп шәкірттеріне теңдесер команда жоқ.

Ресей. Премьер-лига. 19 тур
«Амкар» — «Зенит» — 1:0
Петерборлықтар соңғы 3 кездесуде қарсыластар қақпасына гол соға алар емес. Пермьдегі кездесуге дейін «Зенит» ЦСКА-мен (0:0) және «Ростовпен» голсыз матч өткізген болатын. Соңғы рет «Зенит» 2006 жылы Дик Адвокааттың басшылығымен 3 матчта мергендік таныта алмапты («Динамо» М — 0:0, «Мәскеу» — 0:0, ЦСКА — 0:0).