Әлемге әйгілі шабуылшы Златан Ибрагимович («Манчестер Юнайтед») ағылшын премьер-лигасындағы алғашқы кездесуінде гол соқты. Ол 64 минутта есепті 3:0-ге жеткізді. «МЮ» сырт алаңда 3:1 есебімен жеңіске жетті.
Ибрагимович — жаңа командаларындағы алғашқы матчта-ақ мергендік танытудың шебері. 2004 жылдың 12 қыркүйегінде ол «Ювентус» (Турин, Италия) сапында А сериясындағы бірінші матчына қатысып, «Брешия» командасының қақпасына 69 минутта 3-голды енгізді. Бұл кездесуде Златан алаңға 46 минутта Давид Трезегені алмастырып шықты және өзінің бірден негізгі құрамда ойнамағанына наразылығын жасырған жоқ.
2006 жылы ол «Интерге» ауысып, тағы да А сериясындағы алғашқы матчында гол авторы атанды. Ең қызығы, Златан «Фиорентина» — «Интер» матчында негізгі құрамда шығып, 61 минутта миландықтардың үшінші голының авторы атанды. Яғни, осы мачтарда ол үнемі есепті 3:0-ге жеткізіп отырған.
2009 жылы Ибрагимович «Барселонамен» 5 жылға келісім-шарт жасасты да, Ла Лигадағы дебютін 31 тамыз күні «Спортинг» командасына қарсы өткізді. 82 минутта ол табло көрсеткішін каталондықтар пайдасына 3:0 етіп жазды. Ойын осы есеппен аяқталды. Тағы да 3:0!
2010 жылы Ибрагимович «Барселонамен» айырылысты да, «Миланға» ауысты. «Россонери» сапында ол ойынға 2 турдан араласты. Алайда «Чезенамен» кездесудің 86 минутында Златан пенальти соға алмады, «Милан» 0:2 есебімен ұтылды. Дебюттегі қатты сәтсіздігі осы ғана болар, сірә…
2012 жылы «Пари-Сен-Жермен» жейдесін киген соң, Златан Ибрагимович тағы да жаңа командасының құрамында алғашқы ойында көзге түсті. 11 тамызда өткен кездесуде париждіктер өз алаңында «Лорьяннан» 0:2 есебімен ұтылып жатып, Ибрагимовичтің дублі арқасында тең нәтижеге қол жеткізді.
Бұдан бөлек, «Ибракадабра» 2001 жылы Чемпиондар лигасындағы алғашқы кездесуінде «Аякс» сапында Франция чемпионы «Лион» қақпасына қос гол соқты.