Чемпиондар лигасы
ІІІ іріктеу кезеңі. Қарымта матч
«Легия» (Варшава, Польша) — «Астана» (Қазақстан) — 1:0 (Червински, 76)
«Астана» командасының қорғаушысы Юрий Логвиненко еурокубоктардағы 43-кездесуін өткізіп, бұрынғы рекордшы Х.Р.Каньястан озды.
Қазақстан клубтары сапында еурокубоктарда көп ойынға қатысқан футболшылар:
1. Юрий Логвиненко («Ақтөбе», «Астана») – 43 матч;
2. Рохер Каньяс («Шахтёр», «Астана») – 42;
3. Марат Хайруллин («Ақтөбе») – 41;
4. Дмитрий Шомко («Ертіс», «Астана») – 38;
5-6. Андрей Сидельников («Ақтөбе», «Ордабасы») – 36;
5-6. Самат Сымақов («Ақтөбе», «Қайрат», «Ордабасы») – 36;
7. Петр Бадло («Тобыл», «Ақтөбе») – 35.
Ю.Логвиненко еурокубоктағы алғашқы кездесуін 2006 жылы 18 жасқа 3 күн жетпей «Металлург» (Лиепая, Латвия) командасына қарсы өткізді. Чемпиондар лигасының І іріктеу кезеңі аясында өткен матчтың 75 минутында Юрий А.Малковты алмастырды. Бұл кездесу 1:1 есебімен тең аяқталып, «Ақтөбе» апта бұрынғы сырт алаңдағы сәтсіздіктің (0:1) кесірінен келесі кезеңге шыға алмады.
«Ақтөбе» сапында Логвиненко еурокубоктарда — 29, «Астана сапында» 14 кездесуге қатысты. Осы 43 кездесудің 33-ін ол бастан-аяқ өткерді, 7 рет матч барысында алмастырылды, 3 рет ойынға командаласын ауыстырып араласты.
43 матчтағы Логвиненконың көрсеткіші мынадай: 16 жеңіс, 12 тең ойын, 15 жеңіліс. Доп айырмасы — 55:58. Юрий қатысқан 43 матчтың 14-інде «Ақтөбе» мен «Астана» өз қақпасына доп дарытпапты. Бұған орталық қорғаушы сіңірген еңбек те зор екені сөзсіз.
Логвиненко еурокубоктарда әзірше 1 гол (27.07.2016. «Астана» — «Селтик» — 1:1, 19 минут) соқты.
Ол Еуропаның 25 командасына қарсы ойнады. Соның 12-сін қос матч қорытындысында жеңуге үлес қосса, 11-іне жол берді. 3 командамен топтық турнирде кездесті.
Ю.Логвиненко еурокубоктардың топтық турнирінде 1 рет (2016 жыл, Еуропа лигасы) ойнады. Биыл екінші рет өнер көрсетеді.