Франция астанасы Парижде бұл күндері күрес түрлерінен әлем чемпионаты өтіп жатыр. Кілемге бірінші болып грек-рим күресінің балуандары шықты. Алдымен 71, 75, 85 және 98 келі салмақтағы балуандар жүлделерді сарапқа салды.
Отандасымыз Демеу Жадыраев (71 келі) өте сәтті өнер көрсетіп, әлемнің вице чемпионы атанды. Ол 1/16 финалда норвег Петер Карлсенді 2:1 есебімен жеңді. 1/8 финалда 2015 жылғы әлем чемпионатының қола жүлдегері ресейлік Адам Курактан 0:1 есебімен жеңіліп жатып, қарсы әдіспен 4 ұпай еншілеп кетті. Белдесуді Демеу 6:2 есебімен аяқтады. Ширек финалда қырғыз балуаны Нұрғазы Асанғұловпен кездесу де өте тартысты өтті. Асанғұловтың 4 ұпайына біздің балуанда да таза әдіспен жауап беріп, дереу есеп теңестірді. Одан кейін қарсыласын екі рет қателестіріп, Демеу 6:4 есебімен жеңіске жетті. Жартылай финалда Жадыраев қарсыласы Балинт Корпашиге (Венгрия) тынбай шабуылдап, соңғы ұпайды өзі иеленді. Сөйтіп, финалға жолдама алды!
Финалда Жадыраевқа 2015 жылғы әлем чемпионы, 2012 жылғы Еуропа чемпионы Франк Штеблер (Германия) тап келді. Демеу көбірек шабуылдағанмен, қарсыласының қарсы шабуылына тап болып отырды. Белдесу тәжірибелі Штеблердің жеңісімен аяқталды (8:3).
Ширек финалға жеткен Азамат Құстыбаев (85 келі) Рио олимпиадасының чемпионы Давит Чакветадзеге (Ресей) есе жіберіп қойды. Табло 1:1 есебін көрсетіп тұрғанда Чакветадзе 2 ұпай иеленіп кетті де, ары қарай отандасымыздың 1 ұпай алуына ғана мүмкіндік берді. Оған дейін ол Дорин Пирванды (Румыния, 2:1) және Муньос Ярамиді (Колумбия, 2:0) тұқыртқан еді. Чакветадзе ширек финалда болашақ әлем чемпионы М.Башардан (Түркия) жеңіліп қана қоймай, аяғын жарақаттады. Сөйтіп, жүлдеден Азаматтың да үмітін үзді.
Мақсат Ережепов (75 келі) 1/8 финалда сүрінді. Ол алдымен Георге Мариеаны (Румыния) 4:0 есебімен жеңгенмен, келесі кезеңде Виктор Немешке (Сербия) есе жіберді – 1:2. Немеш артынша жартылай финалда, одан кейін финалда да қарсыластарын бет қаратпай ұтып, әлем чемпионы атағын жеңіп алды.
Жұбаныш белдесуінде Мақсат Иран балуаны Саид Әбдуәлиге 0:4 есебімен есе жіберіп, жүлдеден үмітін үзді.
98 келі салмақта Ерұлан Ысқақов 1/16 финалда Михаил Кажаямен (Сербия) тең ұпай жинады – 6:6. Соңғы ұпайды Кажая алғандықтан, Ерұлан жарыстан шықты. Кажая ширек финалда украиналық Д.Тимченкодан таза жеңілді. Сөйтіп, Ысқақов жұбаныш белдесулерінен де үміт үзді.