Дзюдошы Елдос Сметов 60 келі салмақта Рио олимпиадасының күміс жүлдегері атанды. Ол финалда Ресей балуаны Беслан Мудрановтан қосымша уақытта ұтылды.
Елдос финалға дейін Мұхамед Әлкависаны (Ливия, 1/16 финал, иппон), Эшли Маккензиді (Ұлыбритания, 1/8 финал, юко), Диорбек Оразбаевты (Өзбекстан, 1/4 финал, юко-алтын ұпай), Орхан Сафаровты (Әзірбайжан, жартылай финал, вазари) жолда қалдырды.
Елдос — Асқат Житкеевтен кейін олимпиада финалында күрескен екінші дзюдошымыз. Житкеев Бейжің олимпиадасының финалында моңғол балуаны Тувшинбаяр Найданға есе жіберді.
Елдос — барлық ірі жарыстардың жүлдесіне қол жеткізген бірегей спортшы. Ол — олимпиада вице-чемпионы, әлем чемпионы, Азия ойындарының жеңімпазы, Азия чемпионатының жүлдегері, Гран-при турнирлерінің 2 дүркін жеңімпазы.