2013 жылғы әлем чемпионы Біржан Жақыпов (49 келі) Рио олимпиадасындағы алғашқы кездесуін намибиялық Маттиас Хамуньеламен өткізді. Үш раундта да басымдық танытқан отандасымыз төрешілер ортақ шешімімен 3:0 (29:28, 30:27, 30:27) есебімен басымдық танытты.
-Қарсыласым бір орында тұрмайтын, өте ыңғайсыз болып шықты. Екінші раундта сериялы соққылар жұмсап, едәуір шаршатып алдым. Гонг қағылғанша тынбай жұмыс істедім, — деді Жақыпов.
Ширек финалда Біржан ежелгі қарсыласы Хасанбай Досматовпен (Өзбекстан) кездеседі. Досматов 1/8 финалда мексикалық Хоселито Веласкесті 3:0 (29:28, 29:28, 29:28) есебімен ұтты.
Досматов пен Жақыпов бұған дейін 2 рет қолғап түйістірген. 2013 жылдың ақпан айында Астанада өткен 4 ел турнирінде өзбек боксшысы отандасымызды айқын басымдықпен ұтса, 2013 жылғы әлем чемпионатының 1/8 финалында Біржан 3:0 есебімен басым түсті.
Біржан Жақыпов олимпиадаларға үшінші рет қатысып отыр.
2008 жыл. Бейжің
1/16 финал. Б.Жақыпов — Пал Бедак (Венгрия) – 7:6
1/8 финал. Б.Жақыпов — Оганес Даниелян (Армения) – 13:7
1/4 финал. Б.Жақыпов — Зу Шимин (Қытай) — 4:9
2012 жыл. Лондон
1/16 финал. Б.Жақыпов – Жереми Бекку (Франция) – 18:17
1/8 финал. Б.Жақыпов – Марк Баррига (Филиппин) — 17:16
1/4 финал. Б.Жақыпов – Зу Шимин (Қытай) – 10:13
Біржанға қиын болады-ау… Хасанбай Досматов мықты: тұлғасы мығым, соққылары сұмдық!