Алматының «Қайраты» Еуропа лигасының сапарын бірінші іріктеу кезеңінде Литваның «Атлантас» (Клайпеда) командасымен бастайтын болды. Бұл ұжым 1927 жылы құрылған. Литва чемпионатының үш дүркін күміс жүлдегері, алты рет қола жүлдегері атанған, екі рет Литва кубогын ұтып алған. 2016 жылғы маусымды клайпедалықтар төртінші сатыда аяқтады. 2000 жылдан бері еурокубоктарға қатысып келе жатыр. Ең жоғары көрсеткіші – 2014/2015 маусымда екінші кезеңге шығуы. Бірақ сол кезеңде «Атлантас» жолына Қарағандының «Шахтері» тап болып, клайпедалықтар 0:0 және 0:3 есептерімен ұтылды.
«Қайрат» өткен жылы Еуропа лигасының екінші іріктеу кезеңінде Тель-Авивтің «Маккаби» (Израиль) командасынан жеңілген болатын – 1:1, 1:2.
«Қайрат» — «Атлантас» кездесуі 29 маусымда – Алматыда, 6 шілдеде Клайпедада өтеді.
«Атлантастан» бөлек, Литва командалары арасынан «Жальгирис» командасы біздің өкілмен кездесіп көрді. Өткен жылы вильнюстіктер Чемпиондар лигасының екінші іріктеу кезеңінде «Астанамен» жолығып, екі ойын қорытындысында жол берді – 0:0, 1:2.
13.07.2016 ж. «Жальгирис» — «Астана» — 0:0
20.07.2016 ж. «Астана» — «Жальгирис» — 2:1 (Аничич, 31, 90+2 — Еливелту, 57)
